எய்ம்ஸ் குறித்த கேள்விக்கு, கற்பனை காட்சியா? – முதலமைச்சர் மு.க.ஸ்டாலின்
மதுரை எய்ம்ஸ் மருத்துவமனை என்னவானது என்று கேள்வி கேட்டதால், கற்பனை காட்சிகள் வெளியிடப்பட்டுள்ளதாக தமிழ்நாடு முதலமைச்சர் மு.க. ஸ்டாலின் விமர்சித்துள்ளார்.
மதுரை வந்த உள்துறை அமைச்சரிடம், எய்ம்ஸ் என்னவானது எனக் கேள்வி கேட்டதால் கற்பனை காட்சிகள் வெளியிடப்பட்டுள்ளன என்றும், 2026 தமிழ்நாடு பேரவைத் தேர்தலுக்கு இதுபோதும் என்று நினைத்துவிட்டார்களா என்றும் ஸ்டாலின் கேள்வி எழுப்பியிருக்கிறார்.
மதுரை எய்ம்ஸ் மருத்துவமனையின் முப்பரிமாண வீடியோ இன்று காலை அதன் எக்ஸ் பக்கத்தில் வெளியிடப்பட்டிருந்தது. ஹெலிகாப்டர் இறங்குதளம், குறுங்காடு என பல வசதிகளுடன் அமையவிருப்பதாகவும் அதில் தெரிவிக்கப்பட்டிருந்தது.
இந்த நிலையில், இந்த வீடியோவை இணைத்து இது தொடர்பாக முதலமைச்சர் ஸ்டாலின் தன்னுடைய எக்ஸ் பக்கத்தில் பதிவிட்டிருப்பதாவது,
மதுரைக்கு வந்த மாண்புமிகு மத்திய உள்துறை அமைச்சர் அவர்கள் எய்ம்ஸ் என்ன ஆனது எனச் சென்று பார்த்தாரா? எனக் கேட்டிருந்தேன்.
அதற்குப் பதிலாக, இந்தக் கற்பனைக் காட்சிகளை உருவாக்கி அளித்துள்ளார்கள்.
2026 தேர்தலுக்கு இந்த ஒரு வீடியோ போதும் என நினைத்துவிட்டார்களா?
இதற்கே 10 ஆண்டுகள் ஆகியிருக்கின்றன என்று பதிவிட்டுள்ளார்.