வேலந்தாவளம் அருகே ரூ.40 லட்சம் பறிமுதல்!

கோவை வேலந்தாவளம் அருகே உரிய ஆவணங்கள் என்று எடுத்துச் சென்ற ரூ.40 லட்சத்தை கே.ஜி சாவடி போலீசார் பறிமுதல் செய்தனர்.

தமிழக – கேரள எல்லையான கோவை வழியாக அவ்வப்போது உரிய ஆவணங்களின்றி ஹவாலா பணம் கடத்தப்பட்டு வருகிறது. அதனைத் தடுக்கும் வகையில் வாளையாறு, மற்றும் வேலந்தாவளம் உள்ளிட்ட சோதனை சாவடிகளில் போலீசார் கண்காணிப்பை தீவிரப்படுத்தி வருகின்றனர்.

இந்த நிலையில் கோவையிலிருந்து கேரளாவிற்கு ஹவாலா கடத்தப்படுவதாகக் கே.ஜி சாவடி போலீசாருக்கு ரகசிய தகவல் கிடைத்தது. அதன் அடிப்படையில் கோவை வேலந்தாவளம் சோதனை சாவடியில் இன்று அதிகாலை போலீசார் வாகன சோதனையில் ஈடுபட்டனர்.

அப்போது கோவையிலிருந்து கேரளா நோக்கிச் சென்ற இருசக்கர வாகனம் ஒன்றை நிறுத்திப் போலீசார் சோதனையிட்டனர். அப்போது இருசக்கர வாகனத்தில் கட்டு கட்டாக ரூபாய் நோட்டுகள் இருந்தது தெரியவந்தது. மேலும் அதற்குரிய ஆவணங்கள் இல்லாததால் போலீசார் இருசக்கர வாகனத்தை ஓட்டி வந்த நபரிடம் விசாரணை மேற்கொண்டனர். 

விசாரணையில் பிடிபட்ட நபர் கேரள மாநிலம் பாலக்காட்டைச் சேர்ந்த சுதிர் (55) என்பதும்,  இவர் தனியார் நகைக்கடையில் பணியாற்றி வந்ததும் தெரியவந்தது. இதையடுத்து இருசக்கர வாகனத்தில் எடுத்து வந்த ரூ.40 லட்சத்தைப் போலீசார் பறிமுதல் செய்தனர். இதையடுத்து பிடிபட்ட பணம் மற்றும் சுதீரை வருமான வரித்துறை அதிகாரிகளிடம் போலீசார் ஒப்படைத்தனர்.