கோவை மாணவி பாலியல் வழக்கு – குற்றவாளிகளை காவலில் எடுத்து விசாரிக்க நீதிமன்றம் அனுமதி

கோவையில் கல்லூரி மாணவி பாலியல் வன்கொடுமை செய்யப்பட்ட வழக்கில் சுட்டு பிடிக்கப்பட்ட குற்றவாளிகளை ஒரு நாள் காவலில் எடுத்து விசாரிக்க நீதிமன்றம் அனுமதி வழங்கி உள்ளது.

கோவை விமான நிலையத்தின் பின்புறத்தில் உள்ள பிருந்தாவன் நகர் பகுதியில் கடந்த நவம்பர் 2ஆம் தேதி ஆண் நண்பருடன் பேசிக் கொண்டிருந்த கல்லூரி மாணவியை ஒரு கும்பல் பாலியல் வன்கொடுமை செய்த சம்பவம் பெரும் பரபரப்பை ஏற்படுத்தியது.

இதையடுத்து குற்றத்தில் ஈடுபட்ட குணா என்ற தவசி, சதீஷ் என்ற கருப்பசாமி, கார்த்தி என்ற காளிஸ்வரன் ஆகிய 3 பேரைச் சம்பவம் நடந்த 24 மணி நேரத்திற்குள் தனிப்படை போலீசார் சுட்டு பிடித்தனர்.

பின்னர் கோவை அரசு மருத்துவக் கல்லூரி மருத்துவமனையில் குற்றவாளிகளுக்குச் சிகிச்சை அளிக்கப்பட்டது. சிகிச்சைக்குப் பின்னர் 3 பேரும் கோவை மத்திய சிறைக்கு மாற்றப்பட்டனர்.

இந்த வழக்கில் ஒரு மாதத்திற்குள் போலீசார் குற்றப்பத்திரிக்கை தாக்கல் செய்யத் தமிழ்நாடு முதலமைச்சர் அறிவுறுத்தி இருந்த நிலையில் அடையாள அணிவகுப்பு நடத்தப்பட்டது.

இந்நிலையில் குற்றவாளிகள் மூன்று பேரையும் காவலில் எடுத்து விசாரணை நடத்த 3 நாட்கள் அனுமதி கேட்டு நீதிமன்றத்தில் மனு தாக்கல் செய்தனர்.

இது தொடர்பான மனு நேற்று (நவம்பர் 27) கோவை கூடுதல் மகளிர் நீதிமன்றத்தில் விசாரணைக்கு வந்தது. இந்த வழக்கில் ஆஜராகக் குற்றவாளிகளைச் சக்கர நாற்காலிகள் மற்றும் ஸ்ட்ரெச்சரில் அழைத்து வந்தனர். குற்றம் சாட்டப்பட்ட 3 பேரிடமும் நீதிபதி சிந்து நேரில் விசாரணை நடத்தினார்.

பின்னர் மனுவை விசாரித்த நீதிபதி ஒரு நாள் காவலில் எடுத்து விசாரிக்க அனுமதி அளித்தார். முன்னதாகக் குற்றவாளிகள் ஸ்ட்ரெச்சர் மற்றும் சக்கர நாற்காலியில் அழைத்து வரப்பட்டபோது நீதிமன்ற வளாகத்தில் பரபரப்பான சூழல் நிலவியது.