மெட்ரோ ரயில் ரத்து: அதிமுக – திமுக கூட்டணி கவுன்சிலர்கள் வாக்குவாதம்

கோவை மாநகராட்சி மாமன்ற சாதாரனக் கூட்டம் விக்டோரியா ஹாலில் வெள்ளிக்கிழமை நடைபெற்றது. மேயர் ரங்கநாயகி தலைமையில் நடைபெற்ற இக்கூட்டத்தில் மாநகராட்சி ஆணையாளர் சிவகுரு பிரபாகரன், துணை மேயர் வெற்றிச் செல்வன், மாமன்ற உறுப்பினர்கள், அதிகாரிகள் கலந்து கொண்டனர்.

கூட்டம் துவங்கியதும் கோவை மெட்ரோ திட்டத்தை நிராகரித்த ஒன்றிய அரசுக்குக் கோவை மாநகராட்சி கூட்டத்தில் கண்டனம் தெரிவிக்கப்பட்டது. மேலும் மார்க்சிஸ்ட் கம்யூனிஸ்ட், காங்கிரஸ், கொ.ம.தே.கக்கவுன்சிலர்களும் ஒன்றிய அரசுக்கு எதிராகத் தங்கள் கண்டங்களைப் பதிவு செய்தனர்.

அப்போது மாமன்ற கூட்டத்தில் பேசிய அதிமுக கவுன்சிலர் பிரபாகரன் மெட்ரோ ரயில் திட்டத்திற்கு முறையான அறிக்கையை மாநில அரசு தயார் செய்து கொடுக்கவில்லையெனக் கூறினார். அப்போது அவரைச் சூழ்ந்து கொண்ட திமுக, காங்கிரஸ் கவுன்சிலர்கள் வாக்குவாதத்தில் ஈடுபட்டதால் கடும் அமளி நிலவியது.

அப்போது அதிமுக கவுன்சிலர் கையில் வைத்திருந்த கண்டன பதாகைகளை திமுக கவுன்சிலர்கள் பிடிங்கி கிழித்து வீசியதால் பரபரப்பு ஏற்பட்டது. இதையடுத்து அதிமுக கவுன்சிலர்கள் பிரபாகரன், ரமேஷ் ஆகிய இருவரும் வெளிநடப்பு செய்தனர்.

தொடர்ந்து கோவை மாநகராட்சி சார்பில் ஒன்றிய அரசுக்கு எதிராகக் கண்டன தீர்மானம் நிறைவேற்றப்பட்டது. மேலும் அதிமுக கவுன்சிலர் பிரபாகரனை இரண்டு மாதங்கள் இடை நீக்கம் செய்து மாநகராட்சி மேயர் ரங்கநாயகி உத்தரவிட்டார்.

தொடர்ந்து நடைபெற்ற மாமன்ற கூட்டத்தில் குடிநீர் விநியோகம் அனுமதி, புதிய தார் சாலைகள் அமைத்தல், ஒருங்கிணைந்த குழந்தைகள் நல மையம் கட்டுதல் உள்ளிட்ட 88 தீர்மானங்கள் நிறைவேற்றப்பட்டது. முன்னதாகக் கோவை மாநகராட்சி 46 ஆவது வார்டு நியமன கவுன்சிலராக மாற்றுத்திறனாளியான ராஜபாண்டியன் பொருப்பேற்றுக் கொண்டார்.