தவெகவில் இணைந்தார் ஏ.கே.செங்கோட்டையன்…

அதிமுகவில் இருந்து நீக்கப்பட்ட முன்னாள் அமைச்சர் ஏ.கே.செங்கோட்டையன் தனது கோபிசெட்டிபாளையம் சட்டமன்ற உறுப்பினர் பதவியை நேற்று (நவ.26) ராஜினாமா செய்தார். அதனைத் தொடர்ந்து சென்னை பட்டினப்பாக்கத்தில் உள்ள தமிழக வெற்றிக் கழகத்தின் தலைவர் விஜயின் வீட்டிற்கு மாலை நேரில் சென்ற செங்கோட்டையன் விஜயை சந்தித்து பேசினார்.

தொடர்ந்து சென்னை பனையூரில் இன்று (நவ.27) நடைபெற்ற விழாவில் தவெக தலைவர் விஜய் முன்னிலையில் ஏ.கே.செங்கோட்டையன் தவெகவில் இணைந்தார். அவருடன் திருப்பூர் முன்னாள் எம்.பி சத்தியபாமா உள்ளிட்ட செங்கோட்டையனின் ஆதரவாளர்கள் தவெகவில் இணைந்துள்ளனர்.

தொடர்ந்து தவெக நிர்வாகிகள் மற்றும் செங்கோட்டையன் இணைந்து கூட்டாகச் செய்தியாளர்களைச் சந்தித்தனர்:

அப்போது பேசிய ஏ.கே.செங்கோட்டையன் கூறியதாவது: அதிமுகவில் எம்.ஜி.ஆர் அவர்களால் அடையாளம் காட்டப்பட்டவன். நான் 1972ல் இருந்து அதிமுக என்னும் இயக்கம் தொடங்கியபோது இருந்தவன். பொதுக்குழு முதலில் கூடியபோது அந்தப் பணிகளைச் சிறப்பாக முடித்தேன். அதற்கு எம்ஜிஆர் என்னை மிகவும் பாராட்டினார்.

அதிமுக நூறு நாட்கள் கூட இருக்காது என்று எதிர்க்கட்சியினர் சொன்னார்கள்., ஆனால் அதிமுக மாபெரும் இயக்கமாக உருவானது. அண்ணாவால் பாராட்டுப் பெற்றவர் எம்.ஜி.ஆர். மூன்று முறை முதலமைச்சராக இருந்தார்., நிரந்தர முதல்வர் என்ற பெயரைப் பெற்றார்.

அதன் பின்னர் 1987 -ல் முன்னாள் முதல்வர் ஜெயலலிதா வழியில் பயணத்தை மேற்கொண்டேன். அவரது சுற்றுப்பயணம் ஆலோசனைகளில் பங்கேற்று இருக்கிறேன், அவரது பாராட்டையும் பெற்று இருக்கிறேன்.

ஆனால் இன்று இருக்கும் நிலைமை வேறு ஜெயலலிதா மறைவுக்கு பின் நாங்கள் ஆட்சி நடத்தினோம். இப்போது அதிமுக மூன்று கூறுகளாகப் பிரிந்துள்ளது. அனைவரும் ஒன்றாக இணைய வேண்டும் என்று தான் வலியுறுத்தினோம்.

அவை பரிமாறப்பட்டது தவிர செயல்படுத்தப்படவில்லை. நான் என்று ஒருவன் நினைத்தால், ஆண்டவன் தான் என்று பார்த்துக் கொள்வார். இறைவன் நம்மைக் கண்காணித்துக் கொண்டிருக்கிறான். அனைவரும் ஒருங்கிணைக்க வேண்டும் என்றுதான் தேவர் ஜெயந்திக்குச் சென்றேன். இரு நாட்களில் அதிமுகவின் அடிப்படை உறுப்பினர் பதவியிலிருந்து நீக்கப்பட்டேன். 50 ஆண்டுகளாக இயக்கத்திற்காக ஏற்றத்தாழ்வுகளைச் சந்தித்து எனக்குக் கிடைத்த பரிசு தான் அது.

நான் மட்டுமின்றி என்னைச் சார்ந்தவர்களையும் நீக்கினார்கள். பின்பு தெளிவான முடிவுகளை எடுத்துப் பிறகு தான் நேற்று ராஜினாமா செய்து தவெகவில் இணைந்துள்ளேன். திமுக, அதிமுக வேறு வேறு அல்ல இரண்டும் ஒன்றுதான். மூன்றாவதாக ஒரு கட்சி ஆட்சிக்கு வர வேண்டும்.

விஜய் மாபெரும் இயக்கத்தை உருவாக்க வெற்றி பயணத்தைத் தொடங்கி இருக்கிறார். தமிழகத்தில் புதிய மாற்றம் வேண்டும். ஏன் இவர்கள் மட்டும் தான் ஆள வேண்டுமா? புதிதாக ஒருவர் வேண்டும் என மக்கள் நினைக்கிறார்கள். தில்லியில் ஆம் ஆத்மி, பஞ்சாப்பிலும் புதிய கட்சி ஆட்சி ஏற்பட்டது. மக்கள் மாற்றத்தை எதிர்பார்க்கிறார்கள்.

2026 மக்களால் வரவேற்கப்படுகிற, மக்களால் ஏற்றுக் கொள்ளப்படுகிற, மக்களால் உருவாக்கப்படுகிற புனித ஆட்சி உருவாவதற்கு விஜய் வெற்றி பெறுவார். தமிழ்நாட்டில் 2026 மக்களால் மாபெரும் புரட்சி உருவாகி அவர் வெற்றியை எட்டுவார். திமுக, பாஜக என எந்த மாற்றுக் கட்சியில் இருந்தும் எனக்கு எந்த அழைப்பும் வரவில்லை யாரும் என்னை அணுகவில்லையென பேசினார்.